बेइजिङ, अप्रिल 29 — चीनले युरोपेली संघ (EU) ले आफ्ना उद्योगलाई सुदृढ बनाउन प्रस्ताव गरेको नयाँ “मेड इन युरोप” नीतिप्रति कडा आपत्ति जनाएको छ र उक्त योजना कार्यान्वयन भए प्रतिकारात्मक कदम चाल्ने चेतावनी दिएको छ। चीनको वाणिज्य मन्त्रालयका अनुसार, अप्रिल २४ मा युरोपेली आयोगलाई पठाइएको टिप्पणीमा यस प्रस्तावप्रति “गम्भीर चिन्ता” व्यक्त गरिएको छ।
ईयूले मार्चमा सार्वजनिक कोष प्राप्त गर्न चाहने कम्पनीहरूका लागि नयाँ नियम सार्वजनिक गरेको थियो, जसअन्तर्गत गाडी, हरित प्रविधि र इस्पातजस्ता रणनीतिक क्षेत्रका कम्पनीहरूले निश्चित मात्रामा युरोपमै उत्पादन भएका पुर्जाहरू प्रयोग गर्नुपर्नेछ। यो प्रस्ताव लामो समयदेखि आन्तरिक मतभेदका कारण रोकिएको थियो र अब ईयूको औद्योगिक प्रतिस्पर्धा बढाउने तथा रोजगारी जोगाउने प्रयासको महत्वपूर्ण हिस्सा मानिएको छ।
चीनले उक्त योजनालाई “प्रणालीगत विभेद” भन्दै आलोचना गरेको छ। यदि ईयूले यो कानुन अघि बढाएर चिनियाँ कम्पनीहरूको हितमा क्षति पुर्यायो भने, चीनले आफ्ना कम्पनीहरूको वैध अधिकार जोगाउन आवश्यक प्रतिकारात्मक कदम चाल्ने चेतावनी दिएको वाणिज्य मन्त्रालयले जनाएको छ।
उता, युरोपेली व्यवसायहरूले लामो समयदेखि चिनियाँ कम्पनीहरूले सरकारी अनुदानका कारण अनुचित प्रतिस्पर्धा गरिरहेको गुनासो गर्दै आएका छन्। “इन्डस्ट्रियल एक्सेलेरेटर एक्ट” नाम दिइएको यस प्रस्तावले विशेषगरी चिनियाँ ब्याट्री र विद्युतीय सवारी उत्पादकहरूलाई लक्षित गरेको मानिन्छ, जसअन्तर्गत विदेशी कम्पनीहरूले ईयूमा सञ्चालन गर्दा युरोपेली साझेदारसँग सहकार्य गर्नुपर्ने र प्राविधिक ज्ञान साझा गर्नुपर्ने प्रावधान राखिएको छ।