चिनियाँ विद्युतीय सवारी निर्माता ले आफ्नो नयाँ ‘सुपर ई–प्लेटफर्म’ सार्वजनिक गरेको छ। कम्पनीले यो प्रविधिले विद्युतीय गाडी चार्ज गर्ने समयलाई पेट्रोल भर्ने समयजत्तिकै छोटो बनाउने दाबी गरेको छ।
बीवाईडीका अनुसार नयाँ प्लेटफर्मले अधिकतम १ मेगावाट अर्थात् १००० किलोवाटसम्मको डीसी फास्ट चार्जिङ क्षमता समर्थन गर्छ। कम्पनीले उपयुक्त गाडीमा करिब ५ मिनेट चार्ज गर्दा झन्डै ४०० किलोमिटरसम्मको रेन्ज थप्न सकिने जनाएको छ।
यो प्रणाली १००० भोल्ट उच्च–भोल्टेज आर्किटेक्चरमा आधारित छ। यसमा नयाँ पुस्ताको ‘ब्लेड ब्याट्री’, सिलिकन कार्बाइड पावर चिप तथा ३० हजार आरपीएम क्षमताको मोटर प्रयोग गरिएको कम्पनीले जनाएको छ। उच्च भोल्टेज प्रणालीका कारण ताप नियन्त्रण राम्रो हुने र उच्च गतिमा सुरक्षित चार्जिङ सम्भव हुने बताइएको छ।
बीवाईडीले ‘फ्ल्यास चार्जिङ २.०’ नामक अझ उन्नत संस्करणमाथि पनि काम गरिरहेको विभिन्न अन्तर्राष्ट्रिय सञ्चारमाध्यमले उल्लेख गरेका छन्। उक्त संस्करणले १.५ मेगावाटसम्म चार्जिङ क्षमता दिने र केही मिनेटमै ब्याट्रीको अधिकांश भाग चार्ज गर्न सकिने दाबी गरिएको छ।
कम्पनीले चीनभर करिब २० हजार अल्ट्रा–फास्ट चार्जिङ स्टेशन विस्तार गर्ने योजना पनि सार्वजनिक गरेको छ। युरोपसहित अन्य अन्तर्राष्ट्रिय बजारमा समेत यस्ता चार्जर विस्तार गर्ने तयारी भइरहेको बताइएको छ।
बीवाईडीका ‘हान एल’ र ‘ताङ एल’ मोडलमा यो नयाँ प्लेटफर्म प्रयोग सुरु गरिएको छ। कम्पनीअन्तर्गतको प्रिमियम ब्रान्ड ‘डेन्जा’का आगामी सवारीमा पनि यही प्रविधि प्रयोग हुने अपेक्षा गरिएको छ।
हाल विश्वभर विद्युतीय सवारीको सबैभन्दा ठूलो चुनौतीमध्ये चार्जिङ समयलाई मानिन्छ। यस्तो अवस्थामा बीवाईडीको नयाँ सुपर चार्जिङ प्रविधिलाई विद्युतीय सवारी उद्योगमा महत्वपूर्ण प्रगतिका रूपमा हेरिएको छ।