इजरायलका प्रधानमन्त्री Benjamin Netanyahu ले आफूलाई प्रारम्भिक चरणको प्रोस्टेट क्यान्सर भएको र त्यसको सफल उपचार गरिसकेको खुलासा गरेका छन्।
उनले शुक्रबार सार्वजनिक गरिएको वार्षिक स्वास्थ्य प्रतिवेदनमार्फत पहिलोपटक यो जानकारी दिएका हुन्। रॉयटर्सका अनुसार, नियमित स्वास्थ्य परीक्षणका क्रममा उनको प्रोस्टेटमा सानो ट्युमर भेटिएको थियो, जुन प्रारम्भिक चरणमै रहेको बताइएको छ।
डाक्टरहरूको सल्लाहअनुसार नेतन्याहूले रेडियसन थेरापीमार्फत उपचार गराएका थिए, जसले क्यान्सर पूर्ण रूपमा हटाएको रिपोर्टमा उल्लेख गरिएको छ।
उनले यो जानकारी दुई महिनासम्म गोप्य राखेको पनि बताएका छन्। द गार्जियनका अनुसार, इरानसँगको द्वन्द्वका बीचमा आफ्नो स्वास्थ्यसम्बन्धी सूचना सार्वजनिक गर्दा शत्रुपक्षले प्रचारका लागि प्रयोग गर्न सक्ने डरका कारण उनले प्रतिवेदन ढिलाइ गरेका थिए।
चिकित्सकहरूको भनाइ अनुसार, क्यान्सर प्रारम्भिक अवस्थामा नै पत्ता लागेकाले उपचार सजिलो भएको र अहिले रोग पूर्ण रूपमा हटिसकेको छ।
नेतन्याहूले आफू अहिले “उत्कृष्ट स्वास्थ्य अवस्थामा” रहेको बताएका छन् र नियमित कामकाजमा फर्किएको जनाएका छन्।
उनको स्वास्थ्यबारे यसअघि पनि विभिन्न अफवाहहरू फैलिएका थिए, विशेष गरी इरानसँगको युद्धको समयमा सामाजिक सञ्जालमा गलत सूचनाहरू आएको थियो। पछि उनले भिडियो सन्देशमार्फत आफू स्वस्थ रहेको पुष्टि गरेका थिए।