अमेरिकाको वाशिङ्टन डीसीस्थित ह्वाइट हाउसमा अमेरिकी राष्ट्रपति डोनाल्ड ट्रम्प र बेलायतका राजा चार्ल्स तृतीय बीच हुने भेटघाटका क्रममा सम्भावित “अपमानजनक” घटनाबाट बच्न बेलायती अधिकारीहरूले पत्रकारलाई बैठकबाट टाढा राख्न प्रस्ताव गरेका छन्। द गार्जियन का अनुसार यो निर्णय राजा चार्ल्सको अमेरिका भ्रमणको योजना बनाउने क्रममा गरिएको हो।
रिपोर्टअनुसार, ह्वाइट हाउसले पनि उक्त बैठक क्यामेराबिना गर्ने प्रस्तावमा सहमति जनाएको छ, ताकि कुनै संवेदनशील वा असहज स्थिति सार्वजनिक नहोस्। दुवै पक्षले तस्बिर खिचाउने भए पनि महत्वपूर्ण विषयमा हुने छलफल सार्वजनिक रूपमा प्रसारण नगरिने बताइएको छ।
बेलायती अधिकारीहरूले सन् २०२५ फेब्रुअरीमा युक्रेनका राष्ट्रपति भोलोदिमिर जेलेंस्की र ट्रम्पबीच भएको विवादजस्तै अवस्था दोहोरिन नदिन यस्तो कदम चालिएको जनाइएको छ। उक्त भेटमा ट्रम्प र उपराष्ट्रपति जे. डी. भान्स ले जेलेंस्कीप्रति सार्वजनिक रूपमा कडा टिप्पणी गरेका थिए, जसले सम्बन्धमा तनाव सिर्जना गरेको थियो।
राजा चार्ल्स र रानी क्यामिला अमेरिका आइपुगेपछि ट्रम्प र प्रथम महिला मेलानिया ट्रम्प सँग औपचारिक भेट तथा तस्बिर खिचाइएको थियो।
यो भ्रमण ह्वाइट हाउस करेस्पोन्डेन्ट्स डिनरका क्रममा ट्रम्पमाथि भएको असफल आक्रमण प्रयासको दुई दिनपछि भएको हो। वाशिङ्टनस्थित कार्यक्रममा कोल थोमस एलेन नामक एक व्यक्तिले ट्रम्पतर्फ दौडने प्रयास गरेपछि सुरक्षा अधिकारीहरूले उनलाई नियन्त्रणमा लिएका थिए।