काठमाडौं, असार २, २०८३ — चर्चित सेफ सन्तोष साह विगो बमोजिमको रकम बुझाएर हाजिर जमानी (तारेख) मा थुनामुक्त भएका छन्। जिल्ला प्रहरी परिसर काठमाडौंका एसपी पवनकुमार भट्टराईका अनुसार साहले पीडितलाई रकम बुझाएको भर्पाई पेस गरेपछि उनलाई छाडिएको हो। साहले ठगी दाबी गरिएको कुल ४ लाख ५० हजार रुपैयाँ भुक्तान गरेका छन्।
काठमाडौं जिल्ला अदालतबाट पक्राउ पुर्जी जारी भएपछि काठमाडौं उपत्यका अपराध अनुसन्धान कार्यालयको टोलीले साहलाई जनकपुरबाट नियन्त्रणमा लिएको थियो। शकुन्तला अधिकारीले दिएको ठगीको उजुरीका आधारमा उनीमाथि कारबाही अघि बढाइएको थियो।
यसका साथै, बैंकिङ कसूर सम्बन्धी अर्को एउटा मुद्दामा काठमाडौं जिल्ला अदालतले २०८२ जेठ ३० गते साहलाई २५ लाख रुपैयाँ विगो र १ महिना कैद तथा १२५,००० रुपैयाँ जरिवानाको फैसला सुनाएको थियो। उक्त कैद भुक्तानका लागि अदालतमा हाजिर हुने कानुनी म्याद अझै बाँकी रहेकाले हाल यो मुद्दामा भने उनलाई थुनामा राखिएको छैन।