अमेरिकी अन्तरिक्ष कम्पनी स्पेसएक्सको अत्याधुनिक स्टारशिप रकेट शुक्रबार हिन्द महासागरमा अवतरण (स्प्लासडाउन) गर्ने क्रममा विस्फोट भएको छ, जसलाई कम्पनीले आफ्नो नयाँ पुस्ताको अन्तरिक्ष यानको एक सफल परीक्षण उडानको रूपमा वर्णन गरेको छ।
टेक्ससस्थित स्पेसएक्सको स्टारबेस केन्द्रबाट नेपाली समय अनुसार शनिबार बिहान उडेको उक्त विशाल रकेटले करिब ६६ मिनेटको उडान भरेको थियो। वायुमण्डलमा पुनः प्रवेश गरी पूर्वनिर्धारित अवतरण क्षेत्रमा पुगेर पानीको सतहमा जोडिएको केही सेकेन्डमै गाडी पल्टिएर ठूलो आगोको डल्लोमा परिणत भएको लाइभस्ट्रिम फुटेजमा देखिएको छ।
स्पेसएक्सका अनुसार यो विस्फोटलाई असफलता मानिएको छैन, किनकि यो अन्तरिक्ष यानलाई महासागरबाट सुरक्षित रूपमा फिर्ता निकाल्ने गरी डिजाइन नै गरिएको थिएन। कम्पनीले यस्ता घटनाहरूलाई आफ्नो द्रुत विकास कार्यक्रमको एउटा स्वाभाविक हिस्सा मान्दै आएको छ।
यस उडानका क्रममा स्टारशिपले नक्कली स्टारलिंक उपग्रहहरू सफलतापूर्वक अन्तरिक्षमा तैनाथ गर्नुका साथै वायुमण्डलमा पुनः प्रवेश गर्दा हुने अत्यधिक तापक्रम धान्न सक्ने नयाँ हिट-शिल्ड प्रणालीको परीक्षण समेत गरेको थियो। उडानको समयमा रकेटका ६ वटा इन्जिनमध्ये एउटाले काम नगरे तापनि यानले आफ्ना मुख्य उद्देश्यहरू पूरा गर्न सफल भएको बताइएको छ।
अर्कोतर्फ, रकेटको तल्लो भाग अर्थात् ‘सुपर हेभी बुस्टर’ भने उडानको सुरुवाती चरणमै मुख्य यानबाट छुट्टिएर मेक्सिकोको खाडीमा खसेको थियो।
यो स्टारशिप रकेट नासाको आगामी चन्द्र अभियान ‘आर्टेमिस’ र एलन मस्कको मङ्गल ग्रहमा मानव बस्ती बसाल्ने दीर्घकालीन महत्वाकांक्षाका लागि केन्द्रीय खम्बा मानिन्छ। स्पेसएक्सले यस परिमार्जित संस्करणको स्टारशिपमार्फत आगामी दिनमा उपग्रह, कार्गो र यात्रीहरूलाई चन्द्रमा र मङ्गल ग्रहसम्म लैजाने लक्ष्य राखेको छ।