काठमाडौँ, २०८३ कात्तिक २९ गते। प्रधानमन्त्री बालेन्द्र शाहले छठ पर्वको अवसरमा स्वदेश तथा विदेशमा रहेका सम्पूर्ण नेपालीलाई शुभकामना व्यक्त गर्दै सबै धर्म, संस्कृति र परम्पराको संरक्षण तथा प्रवर्द्धन गर्न सरकार प्रतिबद्ध रहेको बताएका छन्। प्रकृति र आस्थासँग जोडिएको छठ पर्वले धार्मिक तथा सांस्कृतिक एकता, आपसी सद्भाव र प्रकृतिप्रतिको कृतज्ञताको सन्देश दिने उल्लेख गर्दै उनले पर्वको अवसरमा सुख, शान्ति, आरोग्य र समृद्धिको कामना गरेका छन्।
प्रधानमन्त्री शाहले सामाजिक सञ्जालमार्फत शुभकामना सन्देश जारी गर्दै भगवान् सूर्यदेव र छठी माताको आराधना गरी मनाइने यस पर्वले परिवारको सुख, शान्ति, स्वास्थ्य तथा सन्तानको दीर्घायुको कामना गर्ने परम्परा बोकेको उल्लेख गरेका छन्। उनका अनुसार छठ पर्व केवल धार्मिक आस्थासँग मात्र नभई प्रकृतिप्रतिको सम्मान र जीवनप्रतिको सकारात्मक दृष्टिकोणसँग पनि जोडिएको छ।
शुभकामना सन्देशमा प्रधानमन्त्री शाहले छठ पर्वको एउटा महत्वपूर्ण विशेषताबारे पनि चर्चा गरेका छन्। उदाउँदो सूर्यलाई जस्तै अस्ताउँदो सूर्यलाई पनि उत्तिकै श्रद्धा र सम्मानका साथ अर्घ्य अर्पण गर्ने परम्पराले प्रकृतिप्रतिको कृतज्ञता र जीवनका हरेक अवस्थालाई सम्मान गर्नुपर्ने गहिरो सन्देश दिने उनको भनाइ छ।
चार दिनसम्म विधिपूर्वक मनाइने छठ पर्वको पहिलो दिन नहाय–खाय, दोस्रो दिन खरना, तेस्रो दिन साँझ अस्ताउँदो सूर्यलाई र चौथो दिन बिहान उदाउँदो सूर्यलाई अर्घ्य अर्पण गर्ने धार्मिक परम्परा रहेको छ। जलाशय, नदी तथा पोखरीका किनारमा श्रद्धालुहरू भेला भएर सूर्यदेव र छठी माताको पूजा आराधना गर्ने गर्छन्।
प्रधानमन्त्री शाहले छठ पर्वले नेपाली समाजमा आपसी सद्भाव, धार्मिक सहिष्णुता र सांस्कृतिक एकतालाई थप बलियो बनाउने विश्वास व्यक्त गरेका छन्। साथै, यस पर्वले देशमा सुशासन, सामाजिक न्याय र समृद्धिको राष्ट्रिय संकल्प पूरा गर्न सबैलाई सकारात्मक ऊर्जा र प्रेरणा प्रदान गरोस् भन्ने कामना गरेका छन्।
उनले मैथिली भाषामा समेत छठ पर्वको शुभकामना व्यक्त गर्दै सूर्यदेव र छठी माताले सबैको जीवनमा सुख, शान्ति र समृद्धि प्रदान गरून् भन्ने कामना गरेका छन्।
