ट्रम्पले भान्स र रुबियोकै अगाडि गरे आफ्नै सहयोगीको प्रशंसा, सन् २०२८ को राष्ट्रपतिको उम्मेदवार बन्न प्रस्ताव

वासिङ्टन, २०८३ कात्तिक २९। अमेरिकी राष्ट्रपति डोनाल्ड ट्रम्पले उपराष्ट्रपति जेडी भान्स र विदेशमन्त्री मार्को रुबियोको उपस्थितिमै ह्वाइट हाउसका चिफ अफ स्टाफ स्टेफन मिलरलाई सन् २०२८ को राष्ट्रपतीय निर्वाचनमा उम्मेदवार बन्न प्रस्ताव गरेपछि अमेरिकी राजनीतिक वृत्तमा चर्चा सुरु भएको छ।

शुक्रबार ह्वाइट हाउसमा आयोजित पत्रकार सम्मेलनमा ट्रम्पले आफ्ना दुई वरिष्ठ सहयोगी भान्स र रुबियोलाई छेउमा उभ्याएर मिलरको प्रशंसा गरेका थिए। मिलरले ट्रम्प प्रशासनका उपलब्धिबारे लामो धारणा राखेपछि ट्रम्पले उनी भान्स र रुबियोभन्दा राम्रो बोलेको टिप्पणी गरे।

ट्रम्पले मिलरतर्फ संकेत गर्दै भने, ‘तपाईं राष्ट्रपति बन्न चाहनुहुन्छ ?’ उनको यो टिप्पणीपछि पत्रकार सम्मेलनमा उपस्थित व्यक्तिहरू हाँसेका थिए। भान्स र रुबियो दुवै सन् २०२८ को राष्ट्रपतीय निर्वाचनमा रिपब्लिकन पार्टीका सम्भावित उम्मेदवारका रूपमा हेरिँदै आएका छन्।

अन्तर्राष्ट्रिय समाचार संस्था एसोसिएटेड प्रेस (एपी) का अनुसार पत्रकार सम्मेलन करिब ९० मिनेटसम्म चलेको थियो। यस अवधिमा भान्स र रुबियो ट्रम्पको पछाडि उभिएर उनका अभिव्यक्ति सुनिरहेका थिए। ट्रम्पले दुवैलाई पालैपालो बोल्न लगाउँदै उनीहरूको प्रस्तुति र राजनीतिक भूमिकालाई सार्वजनिक रूपमा प्रस्तुत गरेका थिए।

भान्सले आफ्नो मन्तव्यमा ट्रम्पको आर्थिक नेतृत्वको प्रशंसा गरेका थिए। उनले ट्रम्प एसिया भ्रमणमा रहेका बेला आफूले ह्वाइट हाउसको जिम्मेवारी सम्हालेर बसेको बताएका थिए। त्यस्तै, रुबियोले ट्रम्पको चीन र रुस भ्रमण तथा राष्ट्रपति सी चिनफिङ र रुसी राष्ट्रपति भ्लादिमिर पुटिनसँगको भेटवार्ताको बचाउ गरेका थिए।

ट्रम्पले यसअघि पनि भान्स र रुबियोबीच सम्भावित राजनीतिक प्रतिस्पर्धाको विषय उठाउँदै आएका छन्। दुवैले आफू राष्ट्रपति पदका लागि उम्मेदवार बन्ने विषयमा औपचारिक घोषणा गरेका छैनन्। रुबियोले भने भान्स उम्मेदवार बने आफू प्रतिस्पर्धामा नउत्रिने संकेत दिँदै आएका छन्।

मिलर ट्रम्प प्रशासनका प्रभावशाली अधिकारीमध्ये एक हुन्। उनी विशेषगरी आप्रवासनसम्बन्धी कडा नीतिको निर्माण र कार्यान्वयनमा सक्रिय रहँदै आएका छन्। ट्रम्पले पत्रकार सम्मेलनमा मिलरको प्रशंसा गर्दै उनलाई मानिसहरूले सोचेभन्दा बढी दयालु हृदय भएको व्यक्ति पनि बताएका थिए।

ट्रम्पको पछिल्लो टिप्पणीलाई सन् २०२८ को राष्ट्रपतीय निर्वाचनका सम्भावित उम्मेदवारहरूबीचको प्रतिस्पर्धालाई सार्वजनिक रूपमा चर्चामा ल्याउने अर्को घटनाका रूपमा हेरिएको छ। यद्यपि, ट्रम्पले कसैलाई आफ्नो उत्तराधिकारीका रूपमा औपचारिक समर्थन गरेका छैनन्।

स्रोत: एसोसिएटेड प्रेस, इन्डिया टुडे, टाइम्स अफ इन्डिया, द डेली बिस्ट

Scroll to Top