युक्रेनका राष्ट्रपति भोलोदिमिर जेलिन्स्कीले बेलारुसलाई सीमा क्षेत्रमा तैनाथ हवाई सुरक्षा प्रणाली र राडार हटाउन एक साताको समयसीमा दिएका छन्। उनले तोकिएको समयभित्र ती संरचना नहटाइए युक्रेनले आफैं सैन्य कारबाही गरेर नष्ट गर्ने चेतावनी दिएका छन्।
कीभमा शुक्रबार आयोजित पत्रकार सम्मेलनमा बोल्दै जेलिन्स्कीले बेलारुसका राष्ट्रपति अलेक्जान्डर लुकाशेन्कोले आफ्नो देशको शान्तिपूर्ण उद्देश्य प्रमाणित गर्न सीमा क्षेत्रमा रहेका हवाई सुरक्षा प्रणाली र सञ्चार रिले उपकरण हटाउनुपर्ने बताए। उनले “एक साता पर्याप्त समय हो, यदि उनले यो गरेनन् भने हामी आफैं गर्छौं” भन्दै कडा चेतावनी दिएका हुन्।
यो अभिव्यक्ति बेलारुसी बालबालिकाको फुटबल टोली सवार बसमाथि भएको ड्रोन आक्रमणपछि आएको हो। रुसको ब्रियान्स्क क्षेत्रमा भएको उक्त आक्रमणमा टोलीका प्रशिक्षककी श्रीमतीको मृत्यु भएको थियो भने छ जना बालबालिका घाइते भएका थिए। बेलारुसले घटनाको जिम्मेवारीबारे युक्रेनसँग स्पष्टीकरण मागेको छ। युक्रेनले भने आक्रमणमा आफ्नो संलग्नता अस्वीकार गरेको छ।
यसअघि राष्ट्रपति लुकाशेन्कोले आफ्नो देशलाई युद्धमा तान्ने प्रयास गर्नेहरूले “महँगो मूल्य चुकाउनुपर्ने” चेतावनी दिएका थिए। उनले बेलारुस कसैविरुद्ध युद्ध गर्न नचाहेको र कुनै पनि देशलाई धम्की नदिएको दाबी गर्दै आएका छन्।
जेलिन्स्कीले भने लुकाशेन्कोका भनाइभन्दा व्यवहार महत्वपूर्ण हुने बताएका छन्। उनले बेलारुसको तेल प्रशोधन उद्योगतर्फ संकेत गर्दै रुसलाई पेट्रोलियम पदार्थ आपूर्ति गर्ने प्रमुख मुलुकमध्ये बेलारुस एक रहेको दाबी गरे। यदि आवश्यक परे त्यस्तो आपूर्तिमा असर पार्न सकिने संकेत पनि उनले दिएका छन्।
रुसको निकट सहयोगी मानिने बेलारुस सन् २०२२ देखि सुरु भएको रुस–युक्रेन युद्धमा प्रत्यक्ष रूपमा सहभागी भएको छैन। बरु उसले दुवै पक्षलाई वार्तामार्फत समाधान खोज्न आग्रह गर्दै आएको छ। सन् २०२५ सेप्टेम्बरमा लुकाशेन्कोले जेलिन्स्कीसँग व्यक्तिगत भेटवार्ता गरेर सम्भावित सम्झौताबारे छलफल गर्न तयार रहेको बताएका थिए, तर युक्रेनी पक्षले त्यो प्रस्ताव स्वीकार गरेको थिएन।
पछिल्ला केही सातादेखि जेलिन्स्कीले बेलारुसबाट बढ्दो सुरक्षा चुनौती रहेको दाबी गर्दै आएका छन्। उनले यसअघि पनि आवश्यक परे बेलारुसमाथि पूर्वसावधानीस्वरूप आक्रमण गर्न सकिने चेतावनी दिएका थिए। युक्रेनको मानवरहित प्रणाली बलका एक कमान्डरले यस वर्षको सुरुवातमै बेलारुसभित्र करिब ५०० वटा सम्भावित सैन्य तथा रसदसम्बन्धी लक्ष्य पहिचान गरिसकिएको बताएका थिए।
यद्यपि, यी आरोप र चेतावनीबीच स्वतन्त्र स्रोतबाट सबै दाबीहरूको पुष्टि भने भइसकेको छैन। पछिल्लो घटनाक्रमले बेलारुस–युक्रेन सम्बन्धमा थप तनाव सिर्जना हुने र युद्धको दायरा विस्तार हुने चिन्ता बढाएको छ।