प्रचण्डलाई भेटेपछि कुलमानलाई दोहोर्‍याउन ओली सहमत

काठमाडौँ – नेपाल विद्युत प्राधिकरणको कार्यकारी निर्देशकमा कुलमान घिसिङ्ग पुनः नियुक्ति हुने लगभग निश्चित भएको छ।

सत्तारुढ नेपाल कम्युनिष्ट पार्टीका अध्यक्ष प्रचण्ड र प्रधानमन्त्री केपी शर्मा ओली बीच कुलमानलाई प्राधिकरणमा दोहोर्‍याउने सहमति भएको हो ।

शुक्रबारको स्थायी कमिटि बैठक लगत्तै कुलमानलाई प्राधिकरणमा दोहोर्‍याउने सहमति ओली र प्रचण्डबिच भएको थियो । त्यस लगत्तै ओलीले लाइन मिनिस्टर वर्षमान पुनलाई बालुवाटार बोलाएर कुलमानलाई दोहोर्‍याउने गरी प्रस्ताव मन्त्रीपरिषदमा ल्याउन निर्देशन दिएका हुन्।

शुक्रबार अबेर प्रधानमन्त्रीबाट त्यस्तो निर्देशन पाएपछि उर्जा मन्त्री पुनले प्रस्ताव तयार पारेर आगामी मन्त्रीपरिषद बैठकमा पेश गर्ने तयारी गरेको उनका प्रेस संयोजक दयानिधि भट्टले जानकारी दिए।

उनले भने, ‘मन्त्रालयले घिसिङको पुनर्नियुक्तिका लागि प्रस्ताव तयार पारेको छ । आइतबार या सोमबार बस्ने मन्त्रीपरिषद बैठकमा अनुमोदनका लागि पठाउने छ ।’ घिसिङ्गको चार वर्षे कार्यकाल भदौ २९ गते सकिँदै छ । उनले आफ्नो कार्यकालमा लोडसेडिङ्गको समस्यालाई हटाएर प्राधिकरणलाई नाफामा ल्याएका छन् ।

कुलमानलाई निरन्तरता नदिने अडानमा ओली रहे पनि प्रचण्डको दबाबका कारण ओली बाध्य भएको पार्टी स्रोत बताउँछ । कुलमानलाई नै निरन्तरता दिनु पर्ने भन्दै सामाजिक सञ्जालमा अभियान पनि चलेको थियो ।

Advertisement