एकै दिन महराले सफाइ पाए, शिवमायाले मन्त्री पद

काठमाडौँ । बलात्कार प्रयासको आरोप लागेपछि राजीनामा दिएका तत्कालीन सभामुख कृष्णबहादुर महराले अन्ततः सफाइ पाएका छन् ।

सोमबार जिल्ला अदालत काठमाडौँबाट उनले सफाइ पाएका हुन् । संयोगवस्, महराले सफाइ पाएकै दिन तत्कालीन उपसभामुख शिवमाया तुम्बाङ्फेले मन्त्री पद प्राप्त गरेकी छन् । महराको राजीनामापछि केही समय सभामुखको कार्यवाहक भूमिकासमेत निर्वाह गरेकी शिवमायाले सभामुख बन्ने चाहना राखे पनि पार्टीबाट स्वीकृति पाइनन् ।

सत्तारुढ दल नेपाल कम्युनिस्ट पार्टी (नेकपा) ले सभामुख पदमा अग्निप्रसाद सापकोटालाई उम्मेदवार बनाउने भएपछि उपसभामुख शिवमायाले राजीनामा दिएकी थिइन् । संवैधानिक बाध्यताका कारण शिवमायाले उपसभामुख पद त्याग्नु परेको थियो ।

संविधानअनुसार एउटै दल र लिङ्गबाट सभामुख र उपसभामुख हुन नमिल्ने भएपछि नेकपाले शिवमायाको राजीनामा माग गरेको थियो । यद्यपि लामो समयसम्म शिवमायाले राजीनामा नदिने अडान राख्दै आएकी थिइन् ।

आफ्नो कुनै गल्ती नरहेको र अरुको गल्तीको सजाय आफूले नभोग्ने बताउँदै उनले सके सभामुख, नभए उपसभामुख पदमै आफू काम गर्न तयार रहेको बताउँदै आएकी थिइन् । संयोग नै मान्नुपर्छ, तत्कालीन सभामुख महरा सोमबार अदालतबाट निर्दोष ठहर भई हिरासतमुक्त भएकै दिन तत्कालीन उपसभामुख शिवमायाले पनि ‘न्याय’ पाएकी छन् ।

उनले कानुन, न्याय तथा संसदीय मामिला मन्त्रालयको जिम्मेवारी सम्हाल्न पाएकी हुन् । नेकपाले सभामुख पद आफूले नै लिने दावी गरेपछि संविधानको प्रावधानअनुसार उपसभामुख पद शिवमायाले त्याग्नुपर्ने संवैधानिक बाध्यता थियो । कतिपयले शिवमायाको राजीनामालाई ‘उनीप्रतिको अन्याय’ भन्दै आएका थिए ।

यद्यपि फागुन ५ गतेका दिन महरा र शिवमाया दुवैले न्यायको अनुभूति गरेका छन् । महराले आफूमाथि लागेको ‘कलंक’ न्यायालयमार्फत पखालेका छन् भने शिवमायाले विना कसुर उपसभामुख पदबाट राजीनामा दिनु परेको परिस्थितिमा यतिबेला मन्त्रालयको जिम्मेवारी सम्हाल्न पाउनुलाई पनि ‘न्यायानुभूति’का रुपमा लिन सकिन्छ ।

Advertisement