एमसीसीको विरोध गर्नेहरु नाङ्गिन्छन् : कमल थापा

काठमाडौं – राष्ट्रिय प्रजातन्त्रका पार्टी (राप्रपा) का नेता कमल थापाले अमेरिकी विवादास्पद मिलेनियम च्यालेञ्ज कर्पोरेशन (एमसीसी) को विरोध गर्नेहरु नाङ्गिने बताएका छन् ।

देशभर एमसीसीविरुद्ध विरोध चर्किँदै गर्दा सामाजिक सञ्जाल ट्वीटरमा एक ट्वीट गर्दै थापाले एमसिसीको विरोध गर्नेहरु यो कार्यान्वयनमा आएपछी नाङ्गिने तर्क गरेका हुन् । राष्ट्रवादको ढोल पिटेर जनतालाई वेवकुफ बनाउन र देशलाई नोक्सान पार्न खोजेको बताउँदै थापाले आफू मन वचन र कर्मले देशलाई माया गर्ने राष्ट्रवादी भएको दाबी गर्दै एमसिसी नेपालकै हितमा रहेको कुरा एकपटक मात्र नभइ हजार पटक भन्न सक्ने बताएका छन् ।

‘मन वचन र कर्मले देशलाई मायागर्ने राष्ट्रवादी भएको हुँदा एकपटक होइन, हजार पटक भन्न सक्छु कि एमसिसी नेपालको हितमा छ । अहिले एमसिसीको विरोधगर्नेहरु एमसिसी कार्यान्वयनमा आएपछी नाङ्गिने छन्। कसरी राष्ट्रवादको ढोल पिटेर जनतालाई वेवकुफ बनाउन र देशलाई नोक्सान पार्न खोजेका रहेछन्, स्पष्ट हुनेछ ।’ थापाले ट्वीटरमा लेखेका छन् ।

उनले विगतमा चीनको सहयोगमा अरनिको राजमार्ग बनाउँदा नेपाल कम्युनिष्ट बन्ने भयो भन्ने स्याल हुईंया गरिएजस्तै अहिले एमसीसीको विरोध भइरहेको तर्क गरेका छन् ।

थापाले लेखेका छन्, ‘त्यसबेला राजा महेन्द्रले कम्युनिज्म गाडी चढेर आउँदैन भनेझै अहिले अमेरिकी प्रभाव र स्वार्थ एमसिसीमा उडेर आउँदैन, प्रायोजित भ्रमबाट देशलाई माया गर्ने राष्ट्रवादीहरु सतर्क हुनुपर्छ ।’

उनले विदेशी सहयोगको विरोध गर्ने प्रवृति गलत भएको बताउँदै मुलुकको विकासमा साहस र राष्ट्रवादी सोचको खाँचो रहेको बताएका छन् । ‘एकथरी चिनिया सहयोग ‘बिआरआई’को बिरोधगर्ने, अर्काथरी अमेरिकी सहयोग ‘एमसिसी’को बिरोध । दुवै प्रवृत्ति गलत हुन,’ उनले भने, ‘तयुद्धकालिन बिश्व प्रतिस्पर्धामा राजा महेन्द्रले चिन, भारत, अमेरिका, रुस सबैको सहयोग लिएर नेपालमा बिकासको जग राखेका थिए, त्यस्तै दूरदर्शिता, साहस र राष्ट्रवादी सोचको अहिले खाँचो छ ।’

Advertisement