पार्टीमा लागेर झण्डा बोक्दैमा भविष्य उज्ज्वल हुँदैन : रामशरण महत

नुवाकोट– नेपाली कांग्रेसका केन्द्रीय सदस्य एवं पूर्वअर्थमन्त्री डाक्टर रामशरण महतले वर्तमान सरकार काममुखी भन्दा प्रचारमुखी भएको बताएका छन्।

नुवाकोट उद्योग वाणिज्य संघका नव निर्वाचित पदाधिकारीहरुलाई बधाई दिन विदुरस्थित कांग्रेस पार्टी कार्यालयमा आयोजित कार्यक्रममा डा. महतले पूर्वाधारको निर्माण गरेर, नागरिकहरुको जीवनस्तर उकासेर मात्र आर्थिक प्रतिफल आउने खालको आयोजनाहरुको खाका तयार पार्नुपर्ने बताए।

‘प्रधानमन्त्रीज्यू रेलको कुरा बारम्बार गरिराख्नुहुन्छ। रेल आयो भने दुर्घटना हुन सक्छ, ठूलो क्षति हुन सक्छ। त्यसकारण अहिले रेलको चर्चा भन्दा रेल गुड्ने भौतिक संरचनाको चर्चा आवश्यक छ’, महतले भने, ‘हल्लाखल्ला गर्दैमा काम बन्दैन। लगानी भित्रदैन। देशलाई समृद्ध बनाउने हो भने कडा परिश्रम गर्नुपर्छ। एकताबद्ध हुनुपर्छ।’

केही दिनअघि राजधानीमा सम्पन्न भएको लगानी सम्मेलनलाई संकेत गर्दै डा. महतले समृद्ध नेपाल बनाउने सपनासहित आयोजना गरिएको लगानी सम्मेलनमा सम्झौता भइसकेको परियोजनाहरुमा फेरि सम्झौता भएको बताए।

उद्योग वाणिज्य संघ निजी क्षेत्रको अगुवा संस्था भएकोले त्यसको समृद्धिमा कांग्रेस हरपल प्रयासरत रहेको डा. महतले बताए। ‘पार्टीमा लागेर झण्डा बोक्दैमा भविष्य उज्ज्वल हुँदैन। त्यसैले कार्यकर्तालाई पार्टीको कामसँगै आफ्नो व्यापार व्यवसायलाई पनि निरन्तरता दिन आग्रह गर्न चाहन्छु’, महतले भने, ‘नागरिकलाई आर्थिक क्रियाकलापमा लाग्न, व्यवसाय बढाउने खालको कार्यक्रम ल्याउन उद्योग वाणिज्य संघले प्रेरित गर्नुपर्दछ।’

Advertisement